KFS hefur lokið keppni á þessu tímabili. Liðið tapaði öðru sinni fyrir Árborg á Selfossi á þriðjudag og er því úr leik í úrslitakeppninni. Leikið var á gervigrasinu á Selfossi og tapaðist leikurinn 1-3, samanlagt 5-1 í leikjunum tveimur.

Árborg mætir Tindastóli í undanúrslitum og fer fyrri leikurinn fram á Selfossi í dag. KFS hefði því þurft að ferðast á Sauðárkrók á þriðjudaginn til að spila hefði liðið komist áfram.

Nú halda nokkrir leikmenn KFS í nám til Reykjavíkur og vonandi verður hægt að halda úti öflugu starfi í Reykjavík í vetur, eins verður vonandi kraftur í því í Eyjum.

Framundan er lokahóf félagsins sem haldið verður í október og verður örugglega mikið um dýrðir þar.

Leikmenn KFS þakka stuðninginn á heimaleikjum í sumar og aldrei að vita nema þeir mæti til leiks í nýjum búningum næsta sumar.